Fredi Nest

Fredi Nest se sewende album Hey DJ – met sestien snitte; tien daarvan uit Fredi se vernuftige pen – is vol in die kol!

Van die ander vroetelvreuges hierop is die resulataat van samewerkerking tussen Fredi en die trefferliedjiebouers Don Kelly en Marc Brendon.

Van Fredi se vorige album het die snit Getoor  wyd getref: ‘n uitbundige verliefliedjie met van die oorspronklikste, realistiese beskyrwings oor die vrou se vermoë (bates én doepa!) om ‘n volbloedman te  laat vermurwer. Dit verrinneweer inderdaad steeds die dansvloere.

Op dié album is die jolgoete – Hey DJ! (wat spruit uit die album-slotsnit Dis Hier By My), Bly  Net Naby My en Bokkie Vir My: pure makietiemaaiers! Die titelsnit gaan selfs met ‘n splinternuwe danspassie gepaard. Tussen die ander ritmewerk hierop wat aanhits, is die snit Vroetel (Afrikaanse rock-‘n-roll).

Tussen die aangename ritmiese ballades is die snitte Hou My Vas (as ek wil gaan; ook ‘n Nest-komposisie wat aanvanklik deur ‘n sangeres bekend gemaak is), Sonder Jou, Lola, die mooi countrygesoomde liedjie Dit Bly By My en die jolige langarmgenieting Soekie Soek ‘n Man.

Dis ‘n luistervriendelike album: vrolik gepoets met genot, veral op die tiekiedraaisnit Lekkerder By Jou.

Fredi, wat al as Suid-Afrika se eie Chris de Burgh gestempel is, sprei sy musikale vlerke en doen onder meer gevoelvolle weergawes van Right Here Waiting en All my love. En dan plaas hy sy eie komponeervaardigheid langs wêreldklasskeppers met sy skitterkomposisies Another Night Alonely, Only In Your Arms en Let go:  veelsydigheid waarop die internasionale stylstempel pronk.

Die verwerkings is verfrissend en vars, radio- en luistervriendelik én dansvloergedrewe! 

Robin Kielly en Werner Beukes het dié uitklopproduksie behartig.

Party noem hom Suid-Afrika se Chris de Burgh; vir Ander is hy die land se Liedjiefabriek. Fredi Nest is ‘n veelsydige en bekroonde liedjieskrywer en sanger. Nou kyk hy terug op ‘n dekade van welslae en vier die lewe met sy splinternuwe
 trefferalbum Hey Dj

Fredi is die oudste van vyf kinders. Dié gebore Goudstadseun het sy kinderjare in Johannesburg en later Durban deurgebring. Hy’t kleintyd al gesing en kitaar gespeel, maar het eers iewers in sy dertigerjare besluit om musiek sy loopbaan te maak. Toe het hy egter al  heelparty liedjies in die laai gehad, gereed om opgeneem te word. Uit dié Liedjiefabriek as al oor die 180 geregistreerde komposisies in Afrikaans en Engels geskep.

Fredi is inderdaad een van die land se beste liedjieskrywers en kan tereg met verskeie treffers spog.

Sy werk is onder meer opgeneem deur Angela Reed, Anneli van Rooyen, Anrika, Ashaan, Clive Bruce, Freda Francis, Gerhard Badenhorst, Gladiator Ice, Jessica, JJ Stephens, Joey Lane & Lance James, Joggie, Johan Scholtz, Ken Mullen, Leane Heyl, Louis Fivaz, Marelize Lombard, Michael Cox, Natasja Lee, Neen, Philip Moolman, Pierre du Preez, Pieter Koen, Quentin Prinsloo, Ronél Erasmus, Suzaan, Touch Of Class, Wicus Prinsloo, Wikus van der Merwe, Wynand Strydom en Zak van Niekerk

Fredi woon in Pretoria saam met sy gesin in ‘n houthuis wat hy met sy eie hande gebou het. Hier het hy vir homself ‘n ateljee gebou en sy sesde album is die trotse produk daarvan. Hy is baie lief vir die natuur en diere en het 'n steekbaardbrakkie wat ook sy bed deel. Tussen sy talente is ‘n passie vir ou goed; daarom dat hy graag ou motors en enjins nuwe lewe gee. Hy vang graag vis en voel altyd opnuut lus vir die lewe ná ‘n hengel-uitstappie. Snags, wanneer die meeste “normale” mense slaap,  woel hy met sy kreatiwiteit.  Dis dan dat die muse hom besoek met ‘n nuwe melodie en gewoonlik sommer die lirieke ook saambring!

Met Fredi se deursettingsvermoë, passie, talent en geloof lyk die toekoms opwindend!